Prokuroria Federale në Gjermani njoftoi arrestimin e një 49‑vjeçari, të dyshuar si anëtar i grupit të njohur “Qytetarët e Rajhut”, i cili planifikonte atentate ndaj politikanëve.

Mes emrave në listën e supozuar të “të dënuarve me vdekje” përmenden ish‑kancelarët Olaf Scholz dhe Angela Merkel, si dhe ish‑ministra të tjerë federalë.

Sipas raportimeve, i arrestuari, i identifikuar me inicialet Martin Sh. dhe me shtetësi gjermano‑polake, u ndalua mbrëmjen e së hënës në Dortmund. Autoritetet deklaruan se ai kohët e fundit organizonte sulme përmes një faqeje që e kishte titulluar “Politika e Vrasjeve”. Në atë faqe ai shpjegonte një skemë ku mbështetësit do të dërgonin donacione në kriptomonedha, si “shpërblim për kapje”, për persona që do t’i kryenin vrasjet e politikanëve të cilët ai i quante “kundërshtarë”.

Prokuroria e ka cilësuar çështjen si një “plan financimi kriminal të terrorizmit” dhe përgjegjësinë për hetimin e ka marrë prokurori i përgjithshëm federal, Jens Rommel. Sipas raportimeve, Martin Sh. ishte i njohur nga autoritetet që nga viti 2020, kur mori pjesë si anëtar i ‘Qytetarëve të Rajhut’ në protesta kundër masave kufizuese të pandemisë.

Në faqen e të dyshuarit u gjetën “dënime me vdekje” të vetë‑përpilura, të dhëna personale të viktimave të mundshme, si dhe udhëzime për ndërtimin e eksplozivëve, lista e personave përfshinte më shumë se 20 emra.